រដ្ឋមន្ត្រីការបរទេស Abbas Araqchi បានព្រមានថា អ៊ីរ៉ង់ត្រៀមខ្លួនជាស្រេចដើម្បីឆ្លើយតបម្តងទៀត ប្រសិនបើសហរដ្ឋអាមេរិកនៅតែបន្តសកម្មភាពយោធារបស់ខ្លួន។
លោក Abbas Araqchi (រូបថត៖ Reuters)
សេចក្តីថ្លែងការណ៍កាលពីថ្ងៃចន្ទទី២៣ខែមិថុនានេះ ធ្វើឡើងបន្ទាប់ពីអ៊ីរ៉ង់បានវាយប្រហារដោយមីស៊ីលលើមូលដ្ឋានទ័ពអាកាសអាមេរិក al-Udeid ក្នុងប្រទេសកាតា ហើយប្រាប់ថា នេះជា«ការឆ្លើយតបដោយផ្ទាល់ចំពោះការឈ្លានពានរបស់សហរដ្ឋអាមេរិកប្រឆាំងនឹងបូរណភាពទឹកដី និងអធិបតេយ្យភាពរបស់អ៊ីរ៉ង់»។
លោក Araqchi បានសង្កត់ធ្ងន់ថា អ៊ីរ៉ង់នឹង«ឆ្លើយតបម្តងទៀត» ចំពោះសកម្មភាពអរិភាពបន្ថែមណាមួយរបស់អាមេរិក ដែលបង្ហាញនូវឆន្ទៈប្រកបដោយនិរន្តរភាពក្នុងការបន្តវិធានការសងសឹក ប្រសិនបើមានការបង្កហេតុ។
បច្ចុប្បន្ន ពុំទាន់មានរបាយការណ៍ពីអ្នកស្លាប់ឬរបួស ក៏ដូចជាការខូចខាតណាមួយនៅឡើយទេនៅមូលដ្ឋានទ័ពអាកាស al-Udeid។
មូលដ្ឋានទ័ពអាកាស al-Udeid ដែលមានទីតាំងនៅជិតរដ្ឋធានីដូហា គឺជាការដាក់ពង្រាយយោធាដ៏ធំបំផុតរបស់អាមេរិកនៅមជ្ឈិមបូព៌ា និងបម្រើជាទីស្នាក់ការកណ្តាលសម្រាប់ប្រតិបត្តិការដែនអាកាសនៃបញ្ជាការកណ្តាលរបស់ក្រុងវ៉ាស៊ីនតោននៅក្នុងតំបន់។
សូមជម្រាបថា ការផ្លោងគ្រាប់មីស៊ីលរបស់អ៊ីរ៉ង់ដាក់មូលដ្ឋានទ័ពអាមេរិក ត្រូវគេដឹងថាជាការសងសឹកក្រោយមេដឹកនាំអាមេរិក លោក ដូណាល់ ត្រាំ បើកការវាយប្រហារកម្ទេចទីតាំងនុយក្លេអ៊ែរចំនួនបីដូចជា Fordow, Natanz និង Esfahan នៅក្នុងប្រទេសអ៊ីរ៉ង់
កាលពីថ្ងៃទី២២មិថុនា។ ក្រោយមក អ៊ីរ៉ង់បានថ្កោលទោសលោក ត្រាំ ហើយប្រកាសថា អាមេរិកបានចាប់ផ្តើមសង្គ្រាមដ៏គ្រោះថ្នាក់ប្រឆាំងទីក្រុងតេហេរ៉ង់ហើយ៕
ប្រភពអត្ថបទ: Kampuchea Thmey Dail
